ඇමරිකන් සිහිනය

ඇමරිකාවේ නාසා ආයතනය ඇපලෝ ව්‍යාපෘතිය සඳහා සූදානම් වෙන අතරතුර අභ්‍යවකාශගාමීන් සඳහා පුහුණු වැඩසටහනක් නවාජෝ නම්  ඉන්දියානු ජනයා වෙසෙන රක්ෂිත ප්‍රදේශයක පවත්වන්නට කටයුතු යෙදුවේය. මෙම වැඩසටහන පවත්වාගෙන යන අතරතුර දිනක් වයස්ගත නවාජෝ නායකයෙක් සිය තරුණ පුතා සමඟ මෙම ස්ථානයට පැමිණියේය. ඔහු නවාජෝ භාෂාව පමණක් දැන සිටියෙකි. අභ්‍යවකාශගාමීන් පිරිස හමු වූ ඔහු "ඔබලා මේ මොනවාද කරන්න සූදානම් වෙන්නේ යැයි විමසීය?" ඔහුගේ පුතා විසින් මෙම පැනය ඉංග්‍රීසියට හරවනු ලැබීය.


නාසා ආයතනයේ නිලධාරියෙක් ඔහුට තමන් සඳ මතුපිට චාරිකාවක් සඳහා සූදානම් වන බව පැහැදිලි කර දුන්නේය. සිය පුතා වෙතින් මේ ගැන අසා දැනගත් නවාජෝ නායකයා ඉතා උද්යෝගයට පත්ව තමන්ට මෙම කණ්ඩායම සමඟ ඉන්දියානුවන් වෙතින් පණිවිඩයක් සඳ මතට ගෙන යා හැකි දැයි විමසීය. මෙම ඉල්ලීම ඉ‍ටු කිරීම තුළින් ලැබෙන ප්‍රචාරය සහ එහි වාසි ගැන සිතූ නාසා ආයතන බලධාරියා ඊට එකඟ වූ අතර ඒ අනුව නවාජෝ නායකයාගේ පණිවිඩය පටිගත කරන ලදී. ඉන් අනතුරුව ඔවුන් නවාජෝ තරුණයාගෙන් එම පණිවිඩය ඉංග්‍රීසි බසට පරිවර්තනය කර දෙන ලෙස ඉල්ලූ නමුත් තරුණයා කිසිදු හේතුවක් නොදක්වා ඊට අකමැති බව පැවසුවේය. 


ගැටලුවට පත් නාසා නිලධාරියෝ පටිගත කරන ලද පණිඩය ‍රැගෙන නවාජෝ ගම්මානයකට ගොස් ඔවුන් ඉදිරියේ එය වාදනය කර පෙන්වූහ. එය ඇසූ කෙණෙහි සියලුම නවාජෝවරුන් සිනාසෙන්නට විය. නමුත් කිසිවෙක් සිය බසින් වූ සඳ වෙත පණිවිඩය පරිවර්තනය කර දෙන්නට ඉදිරිපත් නොවීය.


අවසානයේදී නාසා නිලධාරීහු ඇමරිකන් රජයේ නිල භාෂා පරිවර්තකයෙකුගේ සහය ලබා ගන්නට තීරණය කළහ. ඒ අනුව කැඳවනු ලැබූ භාෂා පරිවර්තකයා නවාජෝවරුන්ගේ සඳ වෙත පණිවිඩය ඉංග්‍රීසි බසට හැරවීය.


"චන්ද්‍රයාණෙනි, මේ එන මිනිස්සුන්ගෙන් ප්‍රවේශම් වන්න. ඔවුන් එන්නේ ඔබේ භූමිය සොරකම් කර ගැනීමටයි!"

---------------------

ප.ලි.
විසිතුරු ඇරඹී දැන් අවුරුද්දකුත් ගෙවී අවසන්. ඉතින් මෙහි සපැමිණි ඔබ සැමට ස්තූති කරන්නට මෙය හොඳම අවස්ථාවයි......

දයාබර සහෘදයිනි! ඔබෙන් ලද දිරිය වෙනුවෙන් බොහොමත්ම ස්තූතියි! 
ජයෙන් ජය!